譽恩近日因捲詐騙案而受查
有指譽恩亦曾參加過父親嘅投資會議，涉嫌有份詐騙信徒。
【新增回應】
韓國前女團Wonder Girls成員譽恩，其牧師父親去年被爆利用女兒譽恩嘅明星光環騙財，以成立娛樂公司為由，涉嫌騙取150多名信徒，總計約200億韓圜（約1.4億港元），被判有期徒刑6年。
而噚日韓媒爆料，指有受害人聲稱譽恩本人亦曾參加過投資會議，指控佢跟爸爸一齊涉嫌詐騙。
事後譽恩所屬事務所回應譽恩捲入詐騙案一事，表示：「譽恩已接受過一次調查，今後佢將繼續誠實配合警方調查，以證明跟詐騙案無關。對於父親嘅事再度引起爭議，感到非常抱歉。」
而譽恩今日接受韓媒訪問時，表示自己完全冇參與詐騙，而且絕對唔會原諒父親：「我雖然賺得唔多，但可以食想食嘅嘢，都賺到一啲錢貼補家用，我冇參與詐騙事件嘅理由。」
譽恩表示當時父親拜託佢介紹作曲家，因此佢當日於咖啡室跟三個人見面，其中一位正係向佢提告嘅人，譽恩表示當日根本唔係咩投資會議，單純只係介紹嘅場合，如果佢知道係跟騙財有關，佢根本唔會出席。
譽恩透露父親於佢年幼時就不斷外遇，12歲時父母離婚，之後父親再婚，雙方就斷絕關係，直到2012年因為家姐結婚而重新聯絡。父親當時表示好掛住佢、覺得好抱歉，因此佢跟父親呢幾年就有短暫交流，但因不時嗌交而中斷聯絡。譽恩：「我冇諗到對父親暫時嘅原諒，竟然會付出咁大代價。」
譽恩接受訪問時一度哽咽，表示自己於不知情嘅情況下，名字被用作詐騙，佢無法原諒涉嫌詐騙及性騷擾嘅父親，都唔會再跟父親聯絡：「雖然心痛，但我跟此事無關，係堂堂正正嘅，我會努力堅持落去，誠實地接受調查。」
